مقالات

دراما رمضان.. ضربات وضربة لازب !!

محمد ابراهيم

نجحت اسلام مبارك في أول تجربة حقيقية ليها في الموسم الرمضاني المصري المكتظ بالأعمال وصاحب القياسات الصعبة جدا…. نعم نجحت وبقت تريند…وبيتسابق كبار الاعلاميين المصريين على استضافتها…. ولكن’……….

نجح محمو السراج الان و طوال السنوات الفاتت في أعمال درامية مصرية مهم… نعم نجح… ولكن………

سقطت معظم الأعمال الدرامية المحلية في الف باء الصناعة الدرامية… سقطت في الورق المكتوب وصناعة الكادرات الموثرة والحبكة الدرامية.. والذروة وحل العقدة الدرامية.. والإخراج والتصوير والصوت.. نعم سقط اغلبها.. ولكن…..

ولكن دي بقصد بيها حاجات كتيرة ما اتشافت في رحلات النجاح والسقوط…

نجاحات الممثلين السودانيين في الدراما المصرية تحسب ليهم هم فقط… كأشخاص واسامي … ولكنهم بيظلو جزء من تطور صناعة الدراما في مصر…. و احنا ما بيصلنا من النجاحات غير انو يتكتب في التتر الممثل السوداني فلان الفلاني.. ومرات لايكتب السوداني.. وتذوب شخصيتو في المسلسل حتى اللهجة السودانية في العمل الدرامي ماموجودة… وبقدر نشوتنا وزهونا انو فيه ممثل من بني جلدتنا قدر يكون مؤثر في محيط الاقليمي.. لكن… محصلة خبرات الممثل ده واحترافيتو ونجوميتو والوفورات اللي نالها… هي مجرد مكاسب شخصية فقط لاغير.. لا تنعكس على شكل تطور الدراما السودانية..او نقل تجارب وخبرات .. . لانو التطور كان للأشخاص باجتهاداتهم الذاتية او حظوظهم.. وماكان عبر مؤسسات محلية ولا عن طريق تقدم مدروس عبر خطط منهجية …. هي فقط ضربة لازب… لاغير..

اين هو سعيد حامد احد اهم المخرجين في السينما المصرية… اين تأثيره على الدراما السودانية؟ وينو ابراهيم خان وياسر عبد اللطيف وفائزة عمسيب وصلاح بن البادية…. كانوا مجرد أدوات لمخرجين عرب انتهي تأثيره بمجرد زوالهم عن المشهد المصري لا السوداني… ولم يساهموا بخطوة واحدة في اي تطور للدراما السودانية ولو خطوة واحدة ….. وبي كدة بيكون تأثيرهم صفر كبير.

في اتجاه تاني… سقطت الأعمال الدرامية المحلية الموسم ده والمواسم القبلو رغم اجتهادات الجقر وزول سغيل وجلال حامد وغيرهم… ولكنها اجتهادات للهدم… وليست للبناء.. هي هدم ذاكرة جمعية جمالية مشحونة بأعمال درامية تاريخية لسه لاصقة في الوجدان السوداني زي دكين وطائر الشفق الغريب واقمار الضواحي وسكة خطر وغيرها…

كان من الممكن للدراما السودانية ان تكون مؤثرة وقوية ولكن انقطاع الاجيال.. وعزل نقل تجارب أجيال عوض صديق وحاكم سلمان والهادي الصديق رمي درامتنا في مسلسلات تضرب بعرض الحائض كل استحقاقاتها المهنية والموضوعيه.. لاتعرف تضحك من سذاجة إنتاجها وممثليها… ولاتعرف تبكي للحال الوصلت ليهو…
بينما آثر اصحاب المواهب الحقيقية الهجرة شمالا…. وصناعة اسماء بعيدا عن مسرح العبث الدرامي السوداني.

عشان كدة… ابشركم… لسنوات جاية ح ندور في فلك الفشل الكبير… بين دراما محلية فاقدة البوصلة الخارطة الصحيحة… وبين دراميين موهوبين رموا عليها يمين الطلاق البائن

مقالات ذات صلة

زر الذهاب إلى الأعلى