مقالات

صناعة التفاهة…في رمضان

مسامرات….

محمد ابراهيم

صناعة التفاهة بحسب وصف الفيلسوف الكندي المعاصر آلان دونو في كتابه “نظام التفاهة” بقوله انه النظام الاجتماعي الذي تسيطر فيه طبقة الأشخاص التافهين على معظم مناحي الحياة، وبموجب ذلك يتم مكافأة الرداءة والوضاعة والتفاهة بدلاً عن الجدية والمثابرة والجودة في العمل.

وبما ان ذلك كذلك…فان اجمالي استحقاقات هذه الصناعة تتوفر (تربتها) و(بذورها) في هذا المجتمع السوداني المتشبع بها….

وفي رمضان هذا حيث تكثر صناعة الاعلام والمواد الترفيهية عبر المنصات (المطلوقة علي عواهن الاسافير) ..يبرز استحقاف (التفاهة) كصنو للنجاح والشهرة…والنجومية المجانية….

ليس علي صانعي المحتوي بذل جهد كبير… فقط عليهم ان يجيدو في ان يكونوا (صناع محتويات تافهة)….

*سوف ندخل السباق الرمضاني الدرامي بكثير من التفاهة…لاعلينا سوف نقنع الاخرين ان نقل (تفاهات) المجتمع السفلي موجودة واننا بصدد طرحها كقضية موجودة… نشوف كيف؟

نجيب بتين يتكلمو عن علاقتهم المثلية بكلمات واضحة وصريحة….وبعد ده ح نخلي الميديا كلها تتكلم…ونبقى تريند.. ونحقق اعلى المشاهدات..

طيب …يلا (قون)…

لكن دقيقة…وينو المقابل الموضوعي لقذارات (المجتمعات السفلية دي؟)

قصدك شنو؟

قصدي زي مافي بنات ليل..وبنات كافيهات ومثليات..واولاد بيجيبو هدايا تلفونات ويرموا ربط قروش… في عالم مضيء تاني… عالم فيهو كنداكات بيواجهن رصاص الفتلة بزغرودة… فيه شباب (بيتشاكلو) مع المدرعات …يفتشوا بين حديدها الصديء عن معاني الحريات والانسانية والكرامة الانسانية….ليه مابتجيبوهم في مسلسلاتكم

فيه ناس بيقطعو الطريق (علي المسافرين) عشان يكرموهم في الشهر الكريم ده…ليه مابتجيبوهم في مسلسلاتكم…

*ااي لكن ده حنك (مابيقسم) مع المشاهدات الكتيرة…خلينا في (تفاهتنا)

و…و….تتمغي الخرطوم مجددا علي اكوام من القاذورات المسماة مجازا (دراما وبرامج غنائية وحوارية)…

ولن نعدم ان (ننشر) علي كل القنوات بانظمة (تفاهة) متعددة ومتجاوزة….بحوار اصفر ينقب في خصوصيات الناس….بفتاة تتوثب انوثتها غنجا ودلالا …وتتمطى باردافها واعجازها فتحيل الشاشة الى آهات مكتومة….

اخي الكريم…فلنواظب علي صناعة (تفاهتنا) بكل ما اوتينا من قدرة..

مقالات ذات صلة

زر الذهاب إلى الأعلى