مقالات

محاسن احمد ابراهيم تكتب.. في التاون «مشتركة فوق» !!

في التاون…

كنت قاعدة، دايرة افك قروشي ،… مشيت محل التحويلات.

المكان عادي، ناس داخلة وناس طالعة… فجأة، دخل زول، داعم للد.عم السر.يع.

دخل كأنو داخل على بيتو… صاحب المحل بدعم المشتركة ،،
طبعا ما تتفاجأوا التاون اكبر محل تجاري في يوغندا بجمع السودانيين من خلفيات مختلفة سياسيا و في ناس عادية زينا كدا ناس الله برضو قاعدين ،،
اهااا
أول ما شافو، ضحك ليهو كدا ضحكة فيها معرفة قديمة، وقال ليهو:

– “مشتركة فوق!”
وقاموا الاتنين ضحكوا… ضحكة صافية، كأنو مافي شي في الدنيا دي حاصل.

أنا قعدت في مكاني…
ضحكت… بس ضحكتي ما كانت زي ضحكتهم… كانت ضحكة فيها وجع.

قلت في سري:

“يعني شوف… ديل الاتنين… قاعدين هنا، بيتونسوا… بيضحكوا مع بعض…
وأهلم، هناك،، بيتقاتلوا… بيموتوا…
طيب العداء لزومو شنو؟
الحرب دي كلها… لزومتها شنو؟
إذا أنتو هنا، قاعدين مع بعض، وبتحتاجوا لبعض…
ليه هناك بتقتلوا بعض؟
ليه نحنا كـسودانيين، ما قادرين نفهم إنو مافي زول بيقدر يعيش بدون التاني؟
إنو الحكاية دي ما حرب… الحكاية دي خراب.”

اللحظة دي كانت بالنسبة لي درس…
فيها تناقض كبير، بس كمان فيها بصيص أمل…
يمكن لسه فينا إنسانيتنا… بس محتاجين نرجّع وعيّنا

#نحنابرضوأهلكم

محاسن احمد ابراهيم

مقالات ذات صلة

زر الذهاب إلى الأعلى