ثقافة وفن

مصطفى سيداحمد ..الممشى العريض.. وبكائية الحزن النبيل.

بقلم: د/ منال حسن مختار

….. وأبداك من وين؟، من مخاوف ومن شجن، ظني إنك فكرة إعلان الحياة وانتهاءات العوارض والمحن.
أبداك من وين؛ ومن ياتو منفذ ادخلك، ومن ياتو شارع أوصلك؟
كل الدروب يا رفيق بقت معطونة لي آخر الوحل؛ لكني سأستبيح كل الحواجز وادخلك؛ من غناويك ح أدخلك ومن كلامك بدخلك ومن مسامك بدخلك ومن كل قاسم مشترك.
وألا؛ أقول ليك ح ابداك من لحظة سمعتك وأخذت من قبسك هُدى، وبقيت ضمة زاهدة في الدروب المابتجيك ولا بترجع ليا من تالاك صدى.
ومن بين دفاتر ألف عشق وعشق كان الوليد مصطفى ود سيداحمد المقبول، كان بحمل هموم كل البلد، كان طينةً معتقة بالطمي وهلالاً في رأس ميضنة، عشق الوليد مصطفى الحياة ومن تالاها عشق البلد، احتاك هضاريب الصعب وكشح تواريب الأمل، وغنى للبلد نوبة وزنوج بجه وحلب رطانة عربان مواشو ومولدين، في إيدو كانت ريشة وفي حضنو كان عود الوتر ضد الرصاص والانتكاس، وغنى الوليد مصطفى(يابلد) جلبت ليك من بلاد الله البعيدة صنوف من الوجد الملح درت ألقاك بالسمح.
كان الوليد مصطفى في الظهيرة يصطاد من مناقير الكنار سكك الغنى، ومن قرى الليل القصية انتشل عطر الاماني. وبي شتلة وكمنجة ومسطرين رمى ليهو ساس، ومن بيت القصيد دخلت نسيمات النشيد وكان البلد فردة جناحوا التاني، وآاااه يابلد واااا فجعة الزول البجيك وما يلقى فيك غير الهجير، وكل البشاشات القبيل يلقاها ميتة مسممة.
هناك في الممشى العريض وقف الوليد مصطفى ولقاها مكتوبة بالخط العريض في ذمة الحاضر وصية؛ الجات يامصطفى للبلد (جاتا من الأرض ما جاتا من تالا السما).
في ساحة الوطن البتول وقف وليد سيداحمد المقبول وضحك وماهماهو شيء وبكى وهماهو كل شيء، ووقف قليبوا من المشي وكان بتمنى لو يرتاح لحظة علي الدرب، ماهو اصلاً عشق البلد أكتر من الحروف الحايمة في بطن الكتب
عشق البلد قدر الخيال ما مدّ إيدو على السحب وفي كل خاطر كان بجيهو عشق البلد.
مدّ الوليد مصطفى خيل الكلام في لحن النغم المصلوب على ضهر البداية ويردد ياااا مهون تهون عشان يجي للبلد، وفي حضوروا في تابوت السجم كان الوليد مصطفى مصلوب على ضهر النهاية، وانكسر فينا وتر الترجي.
ومن شق الزمان الكان متمنيهو الوليد مصطفى ملأ الغبار البيوت والزقاقات فارقت الدروب، وهناك من جوا العتمة والضلمة والنحيب ظهرت صورة الوليد مصطفى، كان في وسط الداره وكان معاهو أخوان في الإنسانية كانوا في مركب …. وكانت معاهم غنوة للحرية داروا الحزن الأكبر بين الوجعة ودمع المنهل، وكان مصطفى بينهم حاضر، ما احلاهم شالوا معاهو الهم بالجملة جوه المركب…. وسكت المركب وانقطع عشم الوصول.
الدنيا كانت كلها انتظار، والموجة كانت بتحلم بالضفاف والغيمة تحلم بالهطول والصوت يقول: ( …. ياقمرا اقلبي السنسنة الحمرا وشوفي ود سيدأحمد ليه ما جا..) وكان الارتحال قدر الفصول.
ياريتو كان سفرا معاك يالباهي لونك يالشيدت في جوانا صوامع للفرح وفتحت في دنيانا مسارح للأمل وحركت غناويك فينا عصب السكون، لاقدرنا نطولك عشان نجيك لاقدرنا من غيرك نكون، وياما شان زفة خريفك كل عاشق ليك أدى فرضوا، وبنشتهيك وسنظل دوام نشتهيك.
وعن المسافة وعن سفن بالشوق بترسم في بحيراتك ضفافا بنقول ليك ما بتموت فينا الأغاني ياغنانا المشتهينو.

مقالات ذات صلة

زر الذهاب إلى الأعلى