
لاحظت كتير من المرات انو أول ما سوداني يشوف سوداني في الغربة طوالي بشغل نفسه بي حاجة..
يمسك تلفونو يتلفت لمكان تاني المهم ينشغل حتى تمر مرحلة إمكانية التعرف بسلام …
ولو سلم عليك برفع يده من بعيد ويعمل حركة تعني التحية ويخبط صدره … دا بيعني انو كدا السلام عليكم .. وفي نفس اللحظة .. مع السلامة .
وأعتقد السبب الرئيسي إنو القصص المتداولة و البنسمعها دايمآ عن واحد سافر وقابل واحد وبعدين نصب عليه أو طلب يسكن معاه لفترة وندم بعدها أو طلب مساعدة مادية أو تكاليف علاج أو تزكرة طيران للرجوع للسودان
… خلت ناس كتيرة تبعد من إنها تتعرف على أي زول #سوداني يقابلها في طريقها للأسف … من باب (( الباب البجيك منو الريح سده وإستريح ))
وللأسف إنقطعت بين الناس جسور التواصل والمحبة والخوة الكانت بتجمع الناس
ومن خلال عملي في مجال العقارات والإقامات و الخدمات في تركيا كتير من السودانيين أول مايجو تركيا يسألوني … وين السودانيين ساكنين ؟؟؟ فبفرح وأتبسط جدآ فبقول ف مناطق كدا وكدا … طوالي بعدها بقول لي شوف لينا مكان بعيد منهم …
أعتقد القصص السلبية والخبرات السيئة المرت بي بعض الناس وكمان الجو السياسي المسمم في السودان أثر جدآ على علاقتنا في الخارج بي بعض وخلتنا نهرب من سودانيتنا ومن تراب وأرض في يوم جمعنا .
لكن دا مابيعني التعميم بالعكس مرات بتلاقي ناس تسلم عليك وتقرب منك وتسألك إنت من وين وتحاول تبني معاك علاقة طيبة مبنية على الخوة في الله …
وفي ناس كتيرة لو لقتك محتاج بتساعدك وتقيف معاك … ولو إنو ظروف الناس المعيشية والإقتصادية بقت صعبة جدآ للأسف .
أخيرآ :
بتمنى إنو الناس تقابل بعض دايمآ كأنه أول يوم في العيد
و الإبتسامة تسبق السلام وماكل الناس محتاجة منك حاجة … غير شعور إنو نحنا من وطن واحد فمن حقنا نعتز بخوتنا ووطنا الطلعنا منه في الغربة
ولو قابلك المحتاج ساعده بي فرصة عملأو مساعدة مالية لو بتقدر والما بتقدر كلمه بعدم إستطاعتك وأقل حاجة تقدمها ليه دعوة جميلة لانو ربنا بستجيب الدعوات لو كانت صادقة



